تخيل فكرة ايجابية دلوقتي توحي بالسعادة
او ذكرى كويسة مريت بيها وسابتلك أثر إيجابى
مجرد التفكير في الفكرة بتفاصيلها واسترجاع الموقف
بيخليك تعيش نفس المشاعر مرة تانية، وترجع لنفس الحالة
:
وده بينعكس علي وضعية جسدك دلوقتي وملامحك وانت بتبتسم
وبالتالى هينعكس علي سلوكك اللي هتعمله وانت فى الحالة دي
واللي أكيد هيكون مطابق لنفس نوعية الفكرة والشعور
:
تكرار نوعية فكرة معينة بمشاعرها وسلوكها
هيبدأ بالتالى يكون سلسلة كبيرة من الأحداث
اللي فيما بعد هتبقى محصلة خبراتك واللي هتشكل مصيرك .!
:
العلاقة التبادلية فى الكون علاقة غريبة جداً،
كل ما هو كائن اما مؤثر أو متأثر بعملية ما
فى ترابط عجيب من أصغر خلية لأكبر نجم في الكون
:
لكن علي المستوي التكويني للإنسان، بنلاقى إنه أشد ترابط وتأثير
مجرد تكرار فكرة أو مشاعر،
ممكن يكون سبب فى اصابتك بأمراض الضغط والسكر والقولون وقرحة المعدة
أو سبب فى الحياة بشغف ومتعة وفق رؤيتك وأهدافك وطموحاتك
:
والأمر الفارق هنا، إن الحالة اللي بتعيش بيها مالهاش طريق
يعني مافيش طريق للسعادة، مافيش طريق للوفرة، مافيش طريق للرضا
الحالات دي هي قرار بتاخده علشان تقدر توصل لأهدافك
الحالة دي هي الطريق اللي هيساعدك ويعينك ويعكس عمق إيمانك
بنفسك، قدراتك، مهاراتك، خبراتك، قوانين الكون، وخالق كل ما سبق
:
ومن المهم جداً تكون عارف، إن الأحداث، الأشخاص، التجارب الماضية
عمرها ما كانت سبب وحيد لتقرير الحالة اللي بتتكرر معاك بشكل مستمر
لكن استجابتك ليها هي اللي بتحدد، هل التحديات هتاخدك في دواماتها
ولا بتستجيب ليها بالشكل المناسب اللي يخليك مسيطر عليها
:
الحالة اللي بتعيشها والكلام اللي بتكرره لنفسك باستمرار
والتجارب اللي بتركز عليها، والكلام اللي بتوصف بيه مواقفك وحياتك
من أقوي العوامل اللي بتحدد نوعية حياتك،
ونوعية مستقبلك هتبقى من نفس النوع
:
عشان كده لازم دلوقتي تقرر مستقبلك هيكون فين
وقبل ما تحقق نجاح خارجي، لازم تعيشه داخلياً
وتبطل تربط سعادتك بحدث، موقف، شخص، شئ…إلخ
:
وأبسط طريقة هتساعدك علي ده،
لو ما قدرتش تسيطر علي نوعية أفكارك,,
سيطر علي وضعية جسدك، وده هيأثر علي تفكيرك ومشاعرك
:
جرب دلوقتي افرد ضهرك، ارفع راسك، ارمي كتفك للخلف
اتنفس بعمق، وطلع الزفير بقوة، وقول الحمد لله أنا فى أروع حالاتي
وعيش بالطاقة دي بشكل مستمر، وشوف النمو اللي هيبدأ يحصل ليك
:
وقرر تعيش أروع حالاتك الآن
لإن ده مش بس هينعكس علي شعورك
التأثير هيوصل لأصغر جزء من خلاياك
لحد ما ينعكس علي عالمك الخارجي
ابدأ بالتطبيق، وما تحاولش تختصر المسافة
بين الزرع والحصاد، اسمح لحياتك بالنمو
لأنك تستحق .!
